不得了，好耐無睇過一套咁喜歡既電影。
設定上未必算新奇，但係內涵好足，光線﹑畫面﹑音樂都超正，節奏亦掌握得好好，應快得快應慢得慢，唯一攪唔掂係個大肚女友人既支線，無需要吧。
人同人之間既相遇，感情既累積，係無可替代既小事加乘，就算唔同時空既同一個人，幾大同都有小異，唔係你就唔係你，你再好都無法取代另一個人，呢一點係全套戲做得最好。
男女主角既背景同脆弱都係雙方改變同產生牽連既基礎，所以係唔同時空都係唔同既人，演員係兩者之間既表現都出色，男一世成熟左，女二世充滿陰沉，跳同一隻舞望同一個人既氛圍都好明顯唔同，好好睇。
另外兩個世界既人都為左對方而幫對方解開心結，都好有愛好有味道。因為一個人而改變，再為之而改變另一個人，希望對方好，好深刻。
明明隔住塊鏡，都可以好投入共舞，好開心，個場戲超精彩。
為左係埋一齊，不停放鏡製造倒影，各種暖光穿透，再到唔忍心對方因為自己而放手，係黑暗中將所有鏡搬開﹑打爛，都營造到打動人心既場面。
仲有好多細節。因為呷醋而掟公仔，唔會剪瀏海既女二世，送唔出既草戒指，無敏感既男友人，真心拒絕而變好既男一世，有顧忌而同男二世拉開距離，落寞既一對酒杯，認出唔同時空既洞洞鞋。都係好有實感既情節同對白。
包括酒吧夜既瘋癲，清晨既手指，一齊放映電影等等，都甜到十足。
係咁實淨既前提下到底鄰居同塊鏡係咩因由，一開始想擺伏線但又碎又求其既處理，基本上可以唔理。