立論，好睇。故事係平板，瑕疵亦都多，但比坊間絕大多數作品更稱得上「電影」。
如果有人話睇唔明情節，首先佢應該去驗腦。一邊睇一邊就覺得係《黑社會》溝《暗花》既低配版，較差係將兩條線分上下兩半講，令成套戲好似兩個故仔咁，唔夠實淨。
演員功架足，特別係古天樂，真心似做戲。劇情上既描寫其實唔算多，好多時都係唔外露，比如李霧童既心態，又或者太外露，比如王SIR要用埋VO交待。但係各角色都恰如其分係一個沼澤求存既感覺，睇老戲骨更甚。與之相反係諗到Wes Anderson，同樣演員被灌入一個框架，但係唔會變成一個PUPPET無晒神韻。
當然最大功勞肯定係美術，展現出唔同既世界已經令成個人投入係故事。如果真係講呢個係現實中1994既香港，所有野當然唔成立。唯一失色係前段太精彩，後面無咁多花神，得返灰暗畫面同毛毛細雪既時候期待感降低太多，亦係「雷聲大雨點小」主要來源。兩條友都炸爛銅鑼灣，一隊餓狗帶埋弓箭，後面只係暗室打鑊，無貨賣都只係炸舖一SHOT，有理由懷疑4億係唔夠BUDGET。
另一種感覺係不難想像點解啲人鐘意金庸多於古龍，只係套戲之於古龍又多左啲粗暴直白。老野《黑社會》式對白同揀布殺人一節最有FEEL，李文狄舉笑哈哈又係正，最差係程文星突然自白同結尾回帶，毫無意義。
多餘既仲有彈頭背景，本身夠晒工具性，忽然又情義爆發忽然又國安上身，仲要整段死老婆戲入去，最應該CUT走。可以想像點解梁家輝話完全唔知拍緊啲乜。根本成個角色唔知做緊乜。
麥浚龍既角色更加係貫徹佢導演既思想，煞有介事講啲平凡野仲要懶有型，好在做出黎既事跡的確有返咁上下，好壞就另行討論。劇情上，單純講佢炸左醫院就夠，唔使比咁多戲佢，反正講唔晒又唔通，係畫蛇添足。
總結套戲係眼高手低，如果可以剪出3個鐘以上情節應該可以更完整，但係對於會唔會做得更好就存猶，時間一長解釋性元素就充斥，不見得係好事。但係睇到美術世界咁精彩，超值。