就快又過一年喇,估唔到咁快就踏入2010年喇喎
仲記得十年前,即係2000年,因為2000年係第一個世紀到第二個世紀,所以慶祝儀式特別盛大,嗰時既我都只係九歲咋,對呢個世界仍然都係一無所知,估唔到咁快就過左十年喇喎,心智身體都發育,亦都開始成熟喇,要開始面對世界喇!咁快就十八歲,父母都養左我十八年喇,我希望我將來有能力去回報佢地啦,尤其係媽咪,係佢一個人一雙手養大我,而且最近呢五年,老竇詿開左呢個家,媽媽仍然為呢個家出心出力,其實我係知道,我亦都好愛我媽媽,但我唔識用口去表達,所以媽咪都以為我無良心,無所謂,我心入面係愛佢就得啦,希望佢喺呢緊呢一年都可以健康生活,當然希望離開呢個家既老竇同埋出左去自住既家姐都能夠有一個美好既生活啦,我又無諗過要對老竇存仇記恨,因為我覺得咁樣做到頭來都係自己辛苦,我長大喇,應該識諗,爸爸媽媽佢地兩個人之間既事我唔應該插手,我唔想以自己雙手去深化佢地兩個既仇恨,老竇絕對係最錯既一方,不過我原諒佢,我原諒佢唔識諗,原諒佢思想未夠成熟,我亦都好希望新一年,媽媽可以忘記呢個衰佬,唔好再將呢個人既往事掛喺口邊,我知道媽媽咁樣會好辛苦,我聽到都覺得好唔開心,我唔想再問自己我究竟應唔應該去恨呢個老竇,不過宜家既我就認為舊事已過,都五年喇,我唔會忘記媽媽一人之力養育左我五年,雖然我體會不了佢既辛苦,但我明白佢的確係好辛苦,有時佢辛苦完放工,脾氣係大d同臭d,但我又意會不能,結果火球撞火球,火星撞地球,大家不歡而散,希望新一年我自己既脾氣可以轉化為忍受既能力,我唔希望激親媽媽,我希望佢長命百歲,等我呢個不肖子可以回饙返俾佢老人家,宜家媽咪已經五十幾歲喇,又有高血壓,我真係好希望佢血壓既問題可以緩和,唔好太辛苦,因為佢呢一世人已經好辛苦,最後老伴都離佢而去,我唔想佢再受任何痛苦,雖然我唔知我呢一點心,但我亦唔需要向佢表明,我只希望佢開開心心,我默默在背後看就可以喇!
仲有九日就到我十八歲既生日喇,呢個生日比起之前既十七個生日都特別,因為呢個生日係標誌住我成為大人喇,再唔係小朋友,攞既都係成人身份証,希望我既思想配得起呢張身份証啦!但願如此!
係呀!十二月三日就係GVGNP發售之日,雖然我無特意去等呢隻game,但係我都好期待,希望快d有得玩就好喇!
2009年入面,我最唔開心就係見住一個又一個我喜愛既人過身,當中有Michael Jackson,臼井宜人,同埋我最欣賞既播音界皇帝鍾偉明鍾大哥,希望佢地都能夠早登極樂,最好就係全部上晒天堂啦,到時我百年歸老,如果又上到天堂,就可以聽最好聽既英文歌,最好笑既漫畫,都埋最有質素既廣播劇喇!天神真係好自私呀,喺呢一年之內攞走左咁多個能者,太自私喇,真係可惡(ﾞ ｀-´)/
希望佢地喺另一個世界開開心心啦!臭皮囊既痛苦已過去!!!(＾ε＾)
另一邊廂我會好好活落去,好好地努力做自己該做的事,盡量不愧於己!v(^-^)v
