小妹妹既戲真係好強，完全唯之動容。
初頭係酒店報警但又唔想出賣老豆﹑同時為左阿媽既死而崩潰；係餐廳教老豆數又問佢同女友﹑阿媽既關係；為左救老豆寧願將自己一路攬住既熊啤啤被狗咬；最尾跳住舞眼濕濕。幾場都係睇到好心嗡。
撇除演員表現劇本對父女情同小朋友遇故都有出色既地方。老豆一直都對個女好好，好保護。唔單止係好籠統用口講，又或者只係唔想佢學壞染血，佢從來無對個女發脾氣；總係叫佢唔好望自己既暴力血腥行為；會同佢一齊玩估薯片味道；係餐廳寫紙仔氹佢；同佢傾心事；應承佢唔講大話，做唔到又會同佢講自己做唔到。種種都體現到佢真係一個好爸爸。
十歲既小朋友雖然遭逢劇變，但係仍然有小孩子既心，係老豆發癲既時候自己玩估薯片；用公仔同老豆SALUTE；著草都拎功課出黎做；唔捨得熊啤啤。呢啲都係難得保持到既細節，唔會話為左劇情而一夜間變成大人咁。
當然係呢部份其實做得仍有不足，可謂最大敗筆。到底POLLY家庭背景係點？睇到佢成熟同稚氣一面，但係老豆坐監，又同老母分開一段時間，點解佢咁信任佢？老母死左都只係一兩下爆發，而且無怪過老豆，又係點解？比起一般情況佢似乎更容易接受暴力，不論爆車窗定開槍都好順暢咁，又有無咩原因？呢度交待唔好令父女既連結弱左，即使全片好重感情，都耿耿於懷。
另外NATHAN既出事原因又太模糊。一直涉及佢哥哥NICK，同埋另外一個比佢隊冧既大佬，同埋出賣佢地既女人CHARLOTTE，都無講明中間關係同發生過既事，如果咁唔重要又無必要安排咁多角色情節，簡單話佢地有過節咪算囉。而家咁睇就係描寫不足。
最後結局唔係好能夠接受。班警察有無必要亂槍掃射SAMMUEL，殺埋NATHAN？唔覺得有。或者係衷心希望兩父女可以有GOOD END，所以嫌棄佢寫得差。