大場面爆炸﹑武士對決﹑以一敵百，係拍得好睇。幕府時代背景，畫面都特別有種古老既暴力感。手指好似香腸咁亂飛﹑炮彈正中身軀血肉橫飛，係個種味道。
賊軍﹑新發田角色都塑造得有板有眼。最體現得到係山田孝之既角色既「來亂」，最痴線係明明陰鳩大家幾次都仲會接納佢，聽佢支笛，主角威能絕不半端。
撇除一班人既蠢，劇情依然經不起推敲。
賊軍龍蛇混雜，對抗得起官軍都可以當故事咁睇，無來由既生死與共情感就顯得太過。炸完橋平安無事仲未夠，竟然一齊主動過橋挖石油冚對家家剷，完全係做多左。
咁多石油都炸唔爛個山頭，人又無死幾個，笑話黎。
溝口既角色爭議應該係描寫得比較平穩，比多啲掙扎心理更好。的確佢為左保護藩地做左正確決定，借刀滅口係對賊軍唔住，但係so far落黎都唔能夠理解佢真實諗法。甚至欺上瞞下﹑假裝切腹，都有種搵戲黎做Feel。
尤其搵笨係溝口成支軍隊都殺唔到兵士郎。而溝口有槍嫁，身邊啲士兵仲不停上前送死，寧願徒手擋刀都唔抆雞，睇到O哂咀。
佢個女加奈既死安排得又係兀突，明明萬事休矣先走去自殺，係討厭老豆？殉情？守護唔到死鬼老公承諾有內疚？還是？佢肚裡面個件呢？仲係唔係度都無交待到。
總結黎講算係咁上下純粹因為時代感。粗疏編排都好似因為復古而忍受得到。不過時長兩粒幾鐘實在有多次不耐煩既感覺。