先講電影無關。一直想食「蔥仔越南法包」，今日終於一嚐所願，真係物超所值。
結論。無想像中失色﹑變味，亦不過係一如最開初既先導片咁食之無味。就係有種你希望佢係一碗羅宋湯，而佢既心思亦係想做一碗西式蔬菜湯，偏偏成品仍然充斥住中式青紅蘿蔔既味道。
唔夠放﹑唔夠盡﹑唔夠大膽，可能係導演性格使然；縱有行空之勢，亦無力飛天。係硬傷。當年成日捕住拾陸比玖開直播既感覺如是。
全片最大缺點係「嘈」。幾乎每分每秒都有配樂﹑歌聲襯托件事。有能力既講故事同拍攝手法應該係以靜製動，等人細味戲入面個層；哪怕想做啲刺激性﹑有玩味既故事，都應該由畫面帶住觀眾，而唔係配樂主導。
節奏上係頭一part太跳，又講唔好主線，唔理想。另外Honestly每段仔都有種跳出跳入既精神狀態，唔太能夠into個戲。係有幾節刻劃細膩既位投入啲，不過算無冷場，絕不沉悶。
完場時望一望錶，心諗只得個半鐘咁少；隨後講返套戲全長88分鐘，其實以內容黎講絕對短得交關。
莫講話頭幾場其實係挪用後面既shot扮倒敍，有好多角色上既設定﹑建立都可以講多啲令人多啲共情：
- 紀月既朋友經歷勁朦朧，只能夠拼湊想像腦補當年發生咩事，而引伸出黎佢做打劫界KOL既動機同憤世都好脆弱。
- Chelsea點係有錢佬之間斡旋可以多啲著墨，而唔係突然用口講心路歷程；個一下自白不單止唔連貫，直頭係嚇窒左。
- 神父既戲份雖然少，但係每一下都有啲野拋出黎比人知佢既作用；呢點壞個邊係好難拿捏佢既定位，好似係一個要角又好似好工具人咁。
- 南亞人個邊其實都可以扣得緊啲，咁派面具同延續法蘭克個度就唔會咁唔自然同夾硬；彩蛋嘉盈可以話係災難。
- Chelsea同紀月兩個都倔強既人矛盾係可以多好多，即使唔係因為陶俊咁片面既原因，係做事手法﹑價值觀上都可以更多描述。
不過派飯盒上面唔手軟係值得一讚既。而且回歸基本，所有人既前因後果都齊全，係外語片粗製濫造既背景之下做得咁足真係好難得。
講開角色當然必須講，我都係想睇原本HANNA﹑ALMA﹑阿龔﹑戴玉麒既版本。如果話要支持香港電影，用多啲新面孔係好應該，更莫講話呢4個名其實絕不陌生，已經係呢個圈好一段時間。只係在商言商，唔猜測到底呢個project一開始有無呃人入局，換走一啲名氣無咁高既演員好能夠明白，更何況而家呢個陣容都唔係咩高檔卡士，同樣地都係撈左好耐而無機會既人，基本上沒有誰比誰更高檔，成件事其實係可悲大於一切。
只係結果而言，雖則幾個主演都話大家熟絡有默契，戲入面完全睇唔出有咩化學作用。原因可以話好明顯，一黎本身所謂4人團隊就係胡亂組成，各自為政先合理；二黎上面都講到大家既線都唔深，自然無咩交流空間；最後就係，絕對地，選角錯誤。
- RENCI肯撚定係商業計算，人靚波大但係戲份少male gaze重，sorry講句我寧願你再比多啲戲份佢色誘下我，點都叫有發揮機會吧。咁人地真係人靚波大嘛。
- Locker既戲擺明做出黎。正劇少少﹑感情重既位其實唔差，但係做個玩玩下同時暗啞底好認真既廢青就好作狀。個種放唔係發自內心既放，作為一個癲癲地既人睇到好難頂。
- 岑珈其就硬係覺得好奇怪。好似一個十二歲扮十八歲既小朋友咁。而明明個戲佢係應該多少少，有怕事得黎又敢於一搏﹑敢於興奮既野性，呢一點係好違和。
所以，無辦法，個味道就係唔係個回事。
當然套戲係OK既。個調子係有﹑亦係而家難得既片種。特別係撇除最尾一段，佢無刻意整啲比人高潮既濕鳩隱喻去破壞件事。或者淨係呢一點已經阿彌吉蒂。