頭十幾分鐘已經確立到3個人既特性，男人對於「最終宗教」既追尋可見一斑，演技超強。
鎖上單車個鏡頭好有力，好有暗示。之後一再用到幾個元素，咁先叫拍攝。
不過第一場戲有啲悶。對話亦略顯俗套同沉悶。
疑心生暗鬼最高示範。男人其實一直好友善，即使係啞謎都處於一種非暴力既玩弄之中，假如對方能夠接納自己既不安，係咪可以好好地傾落去？一如宗教一樣，當信徒容忍到上帝既虛偽，就可以繼續侍奉。
同樣原因，當男人開始嗜血，劇情就變得俗套，失去精神思辯既味道，淪為普通痴線佬密室逃脫既戲碼。
當然仍然無損箇中好睇之處，只係去唔到精彩既高度。
40分鐘時候出大富翁既比喻，明明好似表現左好多野，又好似乜都無發生過咁。厲害地方係比喻自身同比喻既呈現都唔錯，唔會感覺浪費時間。
一直落黎扭擰位係兩個傳教徒年紀太細經歷太少，好難期望會有高深既擊球回傳。最後Sister P由無腦慌亂變成人造先知，聰明地解開謎題同反殺男人，就顯出「哦，又係咁囉」既感受。
亮點係magic underwear一詞用得好好，雖然一路等緊Sister P捅死男人，但係估唔到用得返呢個key word。
逃離地下室由枱上模型shift去廰室大門一鏡漂亮乾脆，值得多睇幾次。
呢套電影基本上充份展示到拍攝技巧同結構如何彌補劇本平凡既不足，理應比多啲香港人感受下，唔使乜都話無資源無時間就亂鳩咁黎，衰左淨係識瀨地硬。
不過千祈唔好好似個結尾咁垃圾，除非我刻意將佢解讀成Sister P其實已經死左，先會出現啲咁離譜既情節，再去到最尾停留指尖既蝴蝶。但係感覺上仍然係拖。
P.S.新知識：避孕植入物