1. 此前從未睇過張家輝執導既戲，在於坊間風評較差，唔知到呢部為止進步幾多，可能仍然另人失望。入場前基本抱此正常期望，無高亦無低，出黎結果亦預計之中，係想睇既野居多。本人係接受既。visual上某幾節摱車邊更可以稱為喜歡，不過完全明白呢種風格強烈既戲因人而異，不好此道既大抵會搣飛割凳。只係希望巿場上容納多啲呢啲戲種，而唔係大同小異欠缺想像既悶片。
2. 有見及此，香港巿場應該不用看好，中國巿場亦難以叉腳。盡最大理性理解，劉德華係全片重中之重既功能就在於令部戲上到畫。驟眼睇製片﹑投資﹑版權既「星火製作」﹑「電影人製作」﹑「天下一」都唔關劉生事，唔係佢科水，咁佢既出現應該係極具象徵意義：一部劉德華壓軸出鏡既戲絕對符合中國百姓觀，唔好唔過檢。
3. 引申落去，連劉華既梳化服都另有credit，希望係以名換利，成本無幾。但奇就奇在陳法拉都credit一個對白指導。一個咁少正常對話對白既角色都要指導，到底導左啲乜？又，到底我聽錯定點，早段張家輝既對白點解咁多咁似後期配音？
4. 言歸正傳，戲既開幕係精彩。強烈既視覺效果﹑調色，都奠定左電影既風格。不論此處定後面三場(？)主要夢境既畫面都好好睇。而且充份介紹左Dr. Man既角色特質。尤其喜歡玉鐲綠光界開兩邊既shot。只係陸續落黎既場口剪接較亂較促，節奏上失色。
5. 更可惜既係係呢個基礎下浪費左電影自身既個性，調色同Dr. Man係後期表現都十分「正常」，甚少係現實情境出現異色對比，Dr. Man亦無乜離經叛動既舉止，懷疑係導演對自己同觀眾無乜信心，先花重本起好個頭，又無以為繼。最失敗係所謂醫院聆訊一場，劇情上理解Dr. Man係需要有爭議既角色，風格上亦猜測唔想過於沉重，但係老實講入得場既觀眾都係想睇異色調驚慄戲，無興趣既根本唔會入場，何必做呢種多餘既觀眾心理建設呢。真正既觀眾相信都唔會買單。
6. 撇除呢場格格不入既戲，之後條理都清晰；大橋雖則話大路，起碼唔係平舖直敍。要你「發現」﹑先至「估到」。一場比人追既精神分裂，一場燒炭而來既交通意外，都不負《贖夢》賣既visual art。正因如此，淪為對白文戲講出口既結局先令人大屌特屌，如果罪從夢中顯現，理應在夢裡得到解放；自白坐監只係身體上得到自由，真正既心靈救贖仲爭一場主戲。
7. 同理，紀慧玲既作繭自縛亦欠缺一場釋放既出口。前段各種光怪陸離令人引頸以待，後尾草草了結積左一口悶氣。不過相對而言個一段係收貨既。平凡既日常﹑獄警既傳話﹑靜謐既空氣，已經知曉何事，先黎一個重搥巨響。this the fucking drama。
8. 回放之前幾下Jump Scare，情節上雖然做唔到無縫出現，但係都無夾硬做出黎既感覺，乍驚無嚇但有喜，只能夠講下次做好啲啦。
9. 至於Dr. Man既結局，係無諗到really such a small thing，係大格局中甚至彷彿不值一提。可能係「面對自己」既心路歷程上要加多描寫，又或者劉謙要收返埋啲煞有介事既演繹。
10. 最後，超級無語既係到底首Jazz(？)曲風既配樂意欲何在？第一次出現既浪漫鏡頭已經唔多夾，勉強比你過關，which屌《小丑2》既人好應該睇下咩叫不知所謂既歌舞片(段)。到底點解？點解？點解？點解？係點解！當Dr. Man解謎結束，一個明明仲帶有少少沉重需要比蔡辛強以及觀眾整理思緒既時候，要響埋啲完全唔係個回事既輕快歌聲？我既耳朵當下堅係好需要得到救贖。
11. Anyway，再次重申，好希望香港人可以出產多啲風格﹑格調既電影。當年銀河映像都要拍幾套愛情浪漫商業片先出到一套銀河風格既電影，渣渣輝未使重出江湖都揹得起幾年拍一部自己想拍既戲，希望佢身壯力健，拍其他(大陸)爛片既時候都可以得人欣賞。係出面辛苦搵食，返屋企養活頭家，正係寫照。