頭三集，以一個小案作結，尚算唔錯。
一開始特別係第一集既笑位太難睇，甚至有棄劇既念頭，還好之後兩集少左夾硬吱你笑而又唔好笑既橋段，較為輕鬆。
吸引睇落去既反而唔係喜劇同推理元素，而係「主角到底做緊乜」既輕查案手法。
莫名其妙既行動同連接令普通既查案變成睇主角表演，係確立人物上面應記一功。巧妙既亦係兩兩分組令一行五人有各自表演空間，唔會偏重某角，對比《正港分局》又係一大優異。
不過成也蕭何敗也蕭何，以一套刑警劇黎講五個差佬有四個都好似白痴咁，真係難以令人信服。《荒唐分局》呢類得廿幾分鐘既處境喜劇當然無問題，但係一集四十幾分鐘﹑有明顯主線﹑主題既連續劇，人物核心應該同身份背景合切啲，起埋話比人知個幾條蛋散係查案上面有過咩貢獻都好。
比《正港分局》好既亦係長度上三集做小結，唔使強行拖戲。拖足六集又唔好笑咁去講一單案，真係好難頂。
還好係單案有啲意思。
即使結局好難睇，仍然有啲意思。
暫時出到第六集，應該全長二十集，即管睇下硬傷有無改善，要查最大既案又係關於乜野。
P.S.
同時想講近日完食既《新宿野戰醫院》同《ギークス〜警察署の変人たち〜》。
唔知係流行定點，近年日劇好似擺脫有大主題去完線既編劇手法。不嬲覺得好既劇唔一定要有一個大事件去解決，反而解決完之後繼續下文會好困難，好難入局。之但係呢兩套又係無頭無尾咁，講完等於無講都唔知想點。
前者雖則話重點在於醫院同YOKO，但係舞突然消失又係咩一回事？
後者明明有三個女要角，頭幾集仲有筆墨講佢地背景同生活瑣事，結局求其話佢地轉變左，又係咩料？
唔單止電影，電視劇都係每況越下既感覺。