五個小故事，唔太幽默，唔太黑色，唔太諷刺，不過不失。
1. 死左幾十年無啦啦上返人間叫個女改自己個碑個名，因為性別認同係女性。個女唔肯就周圍同人講搵人幫。偏偏個鎮既人願意同鬼相處都唔接納同性戀。個女唔想煩就同佢改，佢仲要問個女係咪真心理解佢。奇怪既係個女點解一開始就收埋自己係屋唔見人，又點解想個鄰居出事，出左事就可以過返正常生活？可惜最後比個翻生既死鬼老豆又搞到自閉多次，又係睇唔明。
2. 覺得個老公煩唔想佢死左仲係咁返黎，於是幫佢完成生前工作唔洗心願未了，算係真實幽默既故仔。趣點反而在於個老公係咁記住乜鬼金婚銀婚長石婚骨婚，每次都送個濕鳩錄音公仔比老婆。老婆打開櫃門一堆公仔係咁發聲笑左出黎。之後仲講到啲公仔係執返黎。因為有條車道成日炒車，就經常有人去等睇戲順便執貨。錯晒重點。
3. 因為梵蒂岡刪除唔知咩墓既決定，所有鬼魂流離失所，被迫通通上天堂，而唔想上天堂既鬼就走去搵神父解救，點樣可以開返個墓比佢地。呢個故仔就真係有啲心意。一黎串爆獨裁極權，二黎彰顥上帝既假仁慈，做錯幾大既事傷害人幾深都好，只要一句懺悔就可以享樂永生，受傷既人反而要為左避開討厭既加害者而諗啲壞事去做。最尾火燒教堂好正。而又無多描述既原失去信仰既神父突然因為咁既事件又信返上帝又係莫名其妙。抵佢比鬼燒死。
(睇返資料發現又記起《Night On Earth》都有激死神父既故仔，就係個個口水多過茶勁痴線既司機一段)
4. 為左搵到真愛天子既老女人突登搵個剛死不久既人參加對方喪禮，仲CHOK個遺孀死者鐘意乜然後跟住黎做等佢上自己身。第一晚唔成功第二晚又再去，第三次甚至去埋人屋企偷衫著增加親密度。遺孀一句「點解你要咁做」係畫龍點睛。口口聲聲話等愛等左好耐，但係隨處搵個唔識既鬼想知乜野係愛，真係唔知真痴定假痴。其中一場坐係洗衣機上面意指自慰真係大開眼界。最尾嬲到去「愛之門」打爆人地啲心鎖真係好痴線。對比先前第2場驚自己心鎖被破壞但係又唔想死左有關連既兩公婆相映成趣。
5. 玩碟仙無反應，但係見住個杯被綠光移到「否認靈體在此」既地方都話「果然唔係度」，乜鬼野事。第二次見到鬼畫符係牆度無深究就相信係鬼魂畫，點知其實係人畫出黎呃人。但係綠光係佢地面前出現，係牆度留字話「全是假的」佢地又無重視，只在乎字面上啲鬼畫符一切一切都係假既，係呃人，充份展現出葉公好龍既精神。但，跟住呢？就咁就完不痛不癢。結尾兩個窮光蛋騙子離開小鎮，將一切超自然既事留返係鎮度，好似有深意又平淡不波。對比一開頭既故仔仲可以拉去反同性戀既嘲弄，咁樣完實在平靜得過於空洞。
初頭某啲位仲係有種《Night On Earth》既感覺，但係玩味完全無得比。鏡頭係有趣既，改用唔知係咪6:9既畫面都有啲意思。好多正面背景定鏡得人物走動既鏡頭。甚至好似舞台劇咁下下都全部人得個正面比人睇。但係故事上同埋諗法都無咁瘋狂同言之有物。