見到有限既評論中都係負評，好想為套戲辯護一下，又或者係想為年青講句公道說話。
事實上，性格缺憾所致，始終無法理解年輕人既狂歡能量從何而來。不論戲裡戲外既音效﹑燈光﹑煙﹑酒﹑性﹑毒﹑等等等等，都係無感。要講有啲共鳴既，可能就係盲目既破壞。
年輕人既憤怒﹑不滿，完全明白。
戲入面各種聲色犬馬既描寫都係趨向過態，到最後一如現實廢老所講係不知所謂，但係年青並不是罪，不是因由，從一開始就只係一場開開心心既畢業旅行，唔係社會建制過份，又點會令年青人變態。
評論都話鼓吹有破壞無建設唔岩，文應載道，咁先係一種壓迫同暴力，令下一代越走越歪。
與其放大全校人既狂歡，不如聚焦六人主角群各人心事﹑各有煩惱既描述。升學﹑重讀﹑家庭壓力﹑同儕﹑感情﹑葯﹑拍片夢﹑體制。。。其實都寫得幾好﹑幾平衡。哪怕係癲狂既派對，佢地都有自己既一面：好既一面，負面既一面。係咪狂歡等如放棄自己既好？如果放下世俗既面具放肆完之後變返一個合符規範既正常人，黃﹑賭﹑毒又有乜野問題。
誠然，單以六條線去延伸至所有年青人都愛放縱玩樂﹑可以不顧一切地去玩去癲係唔實淨。即使加上COVID LOCKDOWN﹑GRAG TRIP既背景都睇唔到多餘既energy點解要用癲喪既方式去發泄，一個唔該，就會覺得套戲「大有問題」。
一有咁既諗法，就要諗下有問題既其實係咪自己。戲入面既學生每一步都係被迫出黎。一開始佢地都聽教聽話，佢地唔係無日無之地去破壞。青春既限度到底應該去到邊度？用一個死老野既框框去思考，又會跌入無法同理年輕人既陷阱。如果睇到最後睇到佢地有思考既一面，其實已經足夠。
戲入面老套地加插左新聞形式去刻意營造討論，一邊係廢老定型，一邊係年青人既控訴，除左格格不入影響流暢度，亦係了無新意，帶不起反思；反而主角Gala年青既自己以及成年既自己一再對自己喊話就好有味道。不論年紀，都要記得自己先過緊自己既人生；有想講既說話，有渴望記住既時刻。在狂歡在體制以外，多啲誠實面對自己，少啲批評批判。
Gala, Nicky, Sam, Toto, Benja, Mario
記住名字，留住青春。