年紀大過我既電影，越舊越醇；短短八十分鐘不到既長度比現今越拍越長既戲更稱得上為一套「電影」。
作為一套喜劇，並非由誇張手法呈現，亦非各種黑色幽默，而係冷洌地吱一聲鑽入你心，有種會心微笑。印象中冷面笑匠許冠文既電影都尚有一種「我係喜劇」既冷空氣傳遞，呢種現實得黎又魔幻既「喜劇」好似真係唔多見。
除左認真地散發喜感之外，過場方式都極為有趣。
起初覺得勁無厘頭，有時長則十幾分鐘，短則幾秒，過一過SHOT就到下一章，出過鏡文字，唔知做乜。睇睇下又覺得幾過癮，最爽皮係前文後理甚至唔使點接，幾隻字就可以交待下一場戲係咩，方便得黎又似睇插畫小說咁有啲野豐富下個故事，有啲詩意。
當然佢唔似（新）詩咁純粹係斬頭斬尾語意不通既垃圾文，有啲過場文字仲有點題作用。
唔少影評都TAG戲入面既政治隱喻，戲入面係淡淡咁散發住「有啲野」既氛圍，但係唔刻意去睇其實可以完全忽視，唯獨其中一幕寫明「民主主義回歸」，就迫不得以去思考，「有咩？」
再撇除種種故事性﹑政治性既東東，以美學角度去欣賞畫面既構成，都值回票價。
更莫講唔同風格帶黎既音樂饗宴，當戲入面既聽眾話「難聽」既時候係會不期然地覆一句，認真咩？
最鐘意佢地坐五日監個幾場，只得大約一分鐘多少少。由第一SHOT拎住啤酒罐坐監就好有玩味，監倉仲有啲靚靚塗鴉做背景。隨住日子過去片段越黎越快，敲啤酒罐既節奏亦越黎越急﹑越黎越多變，由敲樂到擊樂去透視內心，出黎既樂聲仲可以咁悅耳。到最後一日依然無一句對白，由樂曲伴住放監。搞笑既係刑警帶住護耳器叫佢地唔好再返黎。真係好似啤酒咁冷到極點，又GUR到極緻。
個種浪漫，即時諗起《槍火》。