同頭三集開場唔同，非由水季同海既互動開展，而由夏同海既相處中假想水季依然再生。
反而最後由水季結束，期時水季已經係病榻，相信越往後演，水季既痕跡會越淡薄。
無可奈何，無可避免。
頭半篇幅一直轉換水季同有村係有左之後既處境，老實講，係最討厭既編排。
水季一邊總係一家人相安無事咁解決問題，儘管「解決」不必然等於「無衝突」，但係「一家人」嘛，嘈交都係商量既方式，傷人既說話只係代表關心，而最後大前提就係「一家人」嘛，一定會安然無事。
係喇係喇，知你水季好幸福喇。
懷孕手冊既橋段未算老套，最重要有古川琴音加持，同老豆伏係枱度的確溫馨。
所以。
係囉係囉，有村個邊咪突顯得出更加可憐更加慘囉，永遠得一個人死頂，無人關心，畫面都係冷得黎短促。
咁既手法之所以討厭，係「幸福」同「不幸」如果要用極端比較去展示，咁個樣野就唔係由心出發。
無水季一家人去襯托有村就唔孤獨咩？有屋企人陪伴理解水季就唔可以有有村既失落咩？
再者，從原生家庭或者片段式經歷去描述一個角色既負面經歷都係好難睇既寫法。
一樣米養百樣人，你比個啲懶溫情又或者懶冷漠既畫面我其實交待到啲乜？
你講左水季屋企人對佢好好，所以我要認同水季能夠獨力生養小朋友係合情合理，咁中間過程我就要忽略？
咁我想再追溯上去「點解水季老豆咁溫柔」，「點解兩老老來得女都教得出個女任性但懂性，而唔會縱壞心腸」，諸如此類既故事你係咪比到我？
比唔到既你比呢啲片段去谷個角色我都唔會信服個喎。
咁我又想問「點解有村屋企人唔關心個女」，又或者「點解有村咁大個人無朋友同佢商量事情」，你唔寫埋出黎我又點解要單方面地認受有村「真係好可憐」？
講係咁講，群眾係盲目唔理性同易煽動，主流觀眾咪一樣替有村心痛，一樣覺得「係囉係囉，有屋企人咁大包容水季緊係生到海出黎教得咁好啦」咁樣樣囉。
再落後段（由海）解開有村心結，我已經唔太知道套戲想比人睇既主旨係乜。
成段生硬到只能夠落個結論由有村講：「夏係好人，雖然優柔寡斷，但係比到陪伴我。然後，我覺得唔再孤獨喇。」
吓？
粒受精卵個神位係咪唔會再出現嫁喇？咁真係死得好唔抵。。。
竟然連「我可以面對自己落過仔呢件事」既意思都無喎。。。
咁無又唔出奇既，邊有前文後理呀成件事。。。
BTW，海﹑津野句台詞寫得好好。
「（係咪）因為唔係父母，所以唔可以成日係埋一齊。（？）」
再對應返水季一家既愛。
「唔好擅自去決定。幸唔幸福唔係人地講，係自己決定。」
係不明不白又老生常談既情節當中都無乜期望，但係若果，若果。
結局係夏唔做海既老豆，唔接佢返去照顧，但係海依然有夏﹑有村﹑津野既愛，一直到長大後都係對方既生命之中。
咁都幾神。