下了氣

尋日發表左一篇關於我同阿媽鬧交既一篇日誌
記得尋日一路打,心頭把火一路一路咁燒,由起初心情一般轉為憤怒至極.....
但係時間已經將呢一d憤怒沖淡左,兩日時間,我已經可以認記呢一d唔開心既事,當無事發生
唔知對方又得唔得呢?不過無所謂啦,點都好,我同佢都係流住同一樣既血,呢個事實係改變唔到,加上都知佢呢輪第體都唔係咁好,如果你問我怕唔怕失去左佢,我一定會答極之怕,邊個會想自己既家人離開自己,就算啱啱俾佢鬧完都唔會有想佢死既念頭,人地點諗我唔知,不過我肯定唔會想屋企人死
喺呢一次既罵戰當中我都已經及早抽身,最後任得佢鬧,唔知係唔係長大左呢,我覺得再鬧落去,就算真係俾我贏左場交又點?會得到d乜?及早抽身啦,唔好俾條裂痕再伸延落去喇,如果佢覺得鬧返我粒幾兩粒鐘會開心d既,我咪由得佢鬧囉,我可以唔聽,再唔係可以拎耳機出嚟聽歌囉,將佢既惡罵融入歌聲中,正所謂孤掌難鳴,我明白爭執之中雙方都有錯,但係我知道佢,亦都好清楚佢,佢一定認為係我錯晒佢啱晒,因為由每細個既一次爭執完結,,我有問過佢,其實你覺得除左我有錯之外,你有冇一d唔啱呢?佢答"我全部都無錯,錯都係錯晒你(我)度!""我搵到錢就係我大晒"呢兩句令到我覺得好唔舒服,自此,每次鬧完,我都唔會再問呢個問題,免得自己難受,既然佢覺得自己啱晒就由得佢啦,唔怕唔怕,慢慢等時間沖淡唔開心既事,重新既面對佢,最多將來既日子少說話多做事,咁就唔會有位俾佢入到啦,如果我無錯佢都唔會鬧我既,我堅信呢一點,盡量遷就佢啦(＾～＾)

鯉魚龍

睇返之前畫既鯉魚龍,有好多唔滿意既地方,今日改一改,變左重新畫過,畫畫既時間過得好快,可能係我鐘意掛(*^▽^*)

成功

尋日阿sir汝返份地理功課俾我喇,之前記得佢講過做一條地理AL題,對於一個中六學生嚟講都可能只有十一十二分,但我竟然做到有十七分呀,阿sir仲喺旁邊寫左個good字俾我呀,雖然分數同埋個評價喺成個AL課程既功課入面只係好少既一回事,但我真係好開心呀,開心係因為我做功課答題既方向正確,只要我繼續俾心機落去做,我就有機會成功,雖然只係少少既成功,但已經可以成為我努力既一大動力喇,真係好開心呀,雖然尋日同阿媽鬧左場大交,返學路途上都係牲低頭好唔開心,但係慢慢諗返,其實都唔算係乜野一回事吖,同埋返學真係好開心,識到新朋友,有傾有講咁,雖然都仲未太熟,不過起碼無咁悶吖嘛,我有返活力喇,奮鬥奮鬥!!!!

鬧交

尋日因為一d事同阿媽鬧左交....
互相都講左好多傷害對方既說話,過程係衝動,結束係後悔,我嬲佢係嬲佢連我唯一既書枱都唔俾我放書,佢話會整爛張枱,我覺得佢真係好野蠻,書枱唔係用嚟擺放書本既咩?同埋除左書枱,我都無其他地方可以放書啦,認真講句,一個人喺屋企既存在感都係建立於喺屋企屬於自己既位置,但係當自己位置被人不斷咁清除,最後連僅僅一張放書既枱都無,呢種心情是怎樣?我雖然賺唔到錢,但都需要尊嚴....我其實可以好肯定咁講,我阿媽當我係一隻寵物,地位甚至仲差過一隻貓,點解我咁講呢?平時我喺屋企既時候等佢門,佢返嚟,一時笑笑口,一時口黑面黑,就開始要睇面色,每一次鬧交,都係我忍受唔住佢既野蠻而開始,我記得以前佢都無宜家咁野蠻,我由敬愛佢慢慢變成宜家既討厭佢,有人話"屋企人邊會有隔夜仇吖",即使我第二日同佢講返野,佢都仲係鬧我,仲係同我反面,我已經厭倦左佢,同埋佢成日話佢搵到錢就係大晒,我食佢既錢就要聽晒佢話,淨係呢句我就知道佢當我係隻狗咁啦,我好憎佢講呢d說話,食你既錢係因為我無能,宜家打打吓字,我愈來愈憤怒,我好嬲,我決定以後都唔理佢!!!我唔想再理一個喜努無常既人相處,夠喇我好攰喇,真係好攰,我唔想再睇佢面色,我決定將來長大有自己既工作,我一定唔會同佢住,每次佢發脾氣就可以,我發脾氣就唔得,我都有我既生活壓力架,唔係淨止佢有架,我試過好多方法去迎合佢,但每次都換來辛苦,再咁落我覺得我會癲呀,我決定左,以後都唔同佢講野超過一分鐘,全部都用短語回答,佢問我野,我都係答yes or no,我唔敢再講咁多說話,同埋我成日聽到佢講粗口我心都好煩,好憎,我好唔鐘意佢,佢令我太失望,係又鬧唔係又鬧,又話我對佢唔好,同佢d朋友講我點刻薄佢,我一直都屈住屈住,無人同我講無人同我講,佢咁惡,而且每一次佢都話搵到錢就大晒,我仲點樣可以刻薄佢呀???我既憤怒已經去到一個極點,好憎佢好憎佢,今年係我人生第十八年,我決定開始以後都唔理佢,佢今次實在太過傷我心喇

貓貓蓋被了!

呢排香港既天氣真係好凍呀,尤其係新界區,普通都會低幾度,凍到隻手又紅又白呀,洗手洗碗洗面都要接觸咁凍既自來水,真係好難受,有時都覺得自己唔知想點咁,夏天既時候就希望冬天快d到,可以帶來凍既天氣,而且可以打邊爐,但宜家凍天到左喇,隻手真係凍僵,連字都唔想打,所以更新都少左,每日都喺張被入面,唔想走出嚟,雖然係咁凍,但係訓得好舒服,始終凍都係比熱既天氣好,熱既天氣真係好難受,訓又訓唔到,又出汗,但凍既天氣就唔同喇,好易入睡,反而驚訓得太耐,咦!貓貓雖然長毛但都應該會覺得凍個喎,等我幫佢蓋被先....點知過左一陣佢就扔開左塊布,果然佢都係鐘意自由,有時連抱一陣都會發脾氣,雖然次次抱佢佢都係咁,次次我都不爽,但係相處左一年,同佢都建立左一份好深厚既感情,已經視如己出架喇,宜家呢隻衰貓走左上碌架床上面,訓左喺我張被度,好得意,申隻手埋去佢仲會"lam"下你,哈,一陣又要出去喇,喺刺骨既寒風中行走,連吸入既空氣都凍到刺鼻.....所以話冬天跑步係最辛苦,吸左d凍風就會好唔舒服,氣管會好辛苦,日本嗰邊都應該係冬天,我印象入面日本人好鐘意一家人圍喺張茶几買邊,申對腳入几底入面取暖,食下柑橘,一家人有傾有講,唔止身體暖,內心都應該好溫暖啊!大家都要小心身體,唔好冷病呀,傷風感冒就麻煩架喇!

( ´艸｀)