日本時間 05:45
飛機喺大雨下降落関西空港
我地要 06:30 趕搭第一班 はるか 2号去新大阪
即係45分鐘內要過關, 等行李, 搭SHUTTLE BUS由T2去T1, 仲要換21 DAYS RAIL PASS
好彩一切順利, 06:20安全上車!
関西空港去新大阪大約一個鐘
07:38準時到達
我地要拖住兩個大喼趕去綠色窗口劃新幹線嘅指定席車飛
原本想搭08:07 さくら547号竟然滿座!
第一次劃飛就劃唔到...突然間個腦一片空白..
因為我地張JR PASS 唔包括班次最多嘅のぞみ 同 みずほ
之前Check過如果呢班搭唔到就要等兩個鐘...咁咪成日行程亂哂!!?
好彩JR個職員話原來08:17有一班ひかり會到福山
劃完飛仲有時間買早餐, 然後就懷住緊張期待嘅心情上月台迎接新幹線!
第一次搭新幹線, 又快又定又靜, 坐得好舒服!
新大阪去福山又係大約一個鐘, 所以食完早餐抖一陣就到啦!
鎖好兩個大喼入車站儲物櫃後
行程正式開始!
第一站 - 福山城
福山城是睇夜櫻嘅好地方, 但今日落雨, 而且広島嘅櫻花仲未開得好靚
不過福山城就喺福山駅對面, 所以決定到此一遊!
北口一出去已經見到福山城嘅圍牆
然後上一小段樓梯就入左城內範圍
不過真係無乜好睇, 加上落雨關係, 所以影左幾張相就走啦!
我地利用JR PASS再次喺福山駅入閘, 再轉普通列車去尾道
選擇去尾道嘅原因係因為一本漫畫 <純愛塗鴉>
呢本漫畫背景就係尾道!
另外幾年前睇過一個是北川景子嘅相機廣告, 當時己經覺得入面D景好靚...今次搵資料時先發覺原來又係尾道 (之後再發現原來個廣告賣緊我部相機! 啱到咁唔黎唔得啦!)
大約11：00到達尾道
喺觀光窗口攞左份地圖後就出發！
由於尾道對香港人嚟講唔係熱門旅遊區，搜集資料時一直都搵唔到清晰嘅地圖
所以早已經喺GOOGLE MAP "行"過尾道幾次
一出車站先去"林芙美子像"影張相
然後就過馬路另一邊嘅"古寺巡禮"
古寺巡禮其實係一條寺廟徑
尾道面積雖然好細, 但有好多大大小小嘅寺廟
而古寺巡禮就係一條連接其中25間寺廟嘅路線
我們都係順住條路線行到千光寺纜車站
無刻意去哂所有寺廟
淨係喺比較出名嘅持光寺, 光明寺影左幾張相
一個鐘左右就行完
因為我地嘅目的地係纜車站對面嘅朱華園拉麵!
去到門外已經有好多人排隊
排左15分鐘左右就有位啦!
入去後先落單比錢, 店員會比個號碼牌你,再自己搵位坐低
我們點左叉燒麵, 中華そば, 餃子8隻
尾道嘅拉麵湯底係醬油再加上豬油
雖然好肥但好好食!
食飽後去左纜車站隔離嘅艮神社行左個圈
然後就搭纜車上山頂嘅千光寺
千光寺係好出名賞櫻地點 更被列入「賞櫻名所100選」
山頂睇到嘅瀨戶內海景觀都被列入「夜景100選」
仲有就係千光寺入面嘅鐘樓- 驚音樓嘅鐘聲列入「日本の音風景100選」
可惜尾道櫻花仲未開, 而且一直落住毛毛雨, 連瀨戶內海都望唔到
參觀完千光寺後沿著貓の細道落山
叫做"貓の細道", 因為沿途會見到好多貓
而且沿路嘅畫, 廣告牌, 甚至Cafe裝飾全部都係貓
最特別係有一位藝術家喺貓の細道放左108隻貓福石, 好多旅客都專程黎搵佢地!
我地一手拎住把摭, 一手扶住欄杆, 行濕滑嘅石坂路 (漫已經跌左兩次....)
而且雨越黎越密,貓福石都只係搵到幾隻, 隨手影幾張相就算啦
幾經辛苦行返纜車站, 時間只係14:00
我地原先計劃喺千光寺睇完瀨戶內海夜景先返酒店
但上網睇完天氣預報, 雨會一直落到夜晚
搭完凌晨機又好攰, 所以決定放棄夜景提早返酒店休息!
離開尾道前我地再次返到商店街, 尋找隱秘嘅米芝連兩星餐廳 - いわべえ
雖然食完拉麵無幾耐, 但黎到尾道點都要試下尾道燒!
大阪有大阪燒, 広島有広島燒, 各個地方嘅食材都有少少唔同
而尾道燒嘅主要材料就係我唔食嘅雞腎.....不過去旅行咩都要試下嘅!
結果......
食左一啖後就停唔到口, 雖然好飽但係都全部食哂! 正!
食完沿住商店街行返尾道駅, 途中經過漫畫經常出現嘅大和湯 (我不是毒男!)
喺漫畫入面, 大和湯係一間公共澡堂
而現實中佢以前真係一間澡堂, 但而家已經改建成咖啡店啦
差唔多行到車站, 見雨勢細左, 所以去左海邊行下
然後就搭JR返福山駅拎返啲行李, 再轉新幹線去広島
大約17:00就到広島酒店Check in
一入房就即刻訓左三個鐘"救命覺"!!!
訓醒去左酒店附近嘅すしざむらい食壽司
食飽去左車站綠色窗口劃定之後幾日嘅觀光列車指定席位
但最想搭嘅蒸氣火車SL人吉已經滿座!!
唯有再諗下可唔可以調行程...
劃完飛再去Lawson買阿蘇, 黒川, 杖立嘅巴士車票
但買唔到阿蘇去黒川嗰一程, 擔心左我幾日.....
最後仲要返酒店, 上流通網買4月12日西野カナ演唱會門票
首先上網確認購買後, 要喺30分鐘內到便利店比錢, 所以又即刻衝落去便利店
比錢後, 賣家就會寄門票去你所提供嘅地址, 我要求賣家寄去東京嘅酒店
但我4月8日先到東京, 所以之後又擔心左十幾日...
今日雖然天氣麻麻, 被迫提早返酒店, 但都好開心!
下次好天一定會再去一次尾道
慢慢行貓の細道搵貓福石! 睇瀨戶內海夜景!