今朝10:00起身, 第一件事就係拉開窗簾睇下天氣
因為今日要去我夢寐以求嘅宮島!
結果係 大 晴 天!
上午行程只有原爆遺址
所以可以訓晏少少, 11:00正式出發
原本打算去平和公園同原爆紀念館
為左行程唔好太趕, 加上好多人去完後都話心情會好低落...所以決定取消!
去原爆遺址要搭広島電車
從広島駅出發約15分鐘就到原爆遺址前
落車後過馬路就到
1945年8月6日
美國從空中投下人類第一顆原子彈..
附近幾公里幾乎夷為平地
僅有少數建築物無倒塌, 呢座圓頂屋就係其中之一
雖然無倒塌, 但都已經被嚴重破壞...
要後期加工先可以令建築物更穩固
離開圓形屋頂, 過去河(元安川)對面有睇櫻花
今朝睇過櫻花預報, 広島仍然未滿開....
而我地睇到嘅都只係初開狀態
不過第一次睇櫻花已經令我地好興奮啦!
沿途坐左唔少日本人係河邊睇住櫻花野餐
跟住落黎要去今日嘅重點行程 - 宮島
我地沿著元安川行返原爆遺址前搭電車
不過呢架路面電車龜速行駛...加上停左接近30個車站
足足花左一個鐘先到達宮島口
落車後仲要搭船先到達宮島
船有松大汽船和JR可以選擇
我地當然選擇JR啦! 因為可以用JR PASS免費乘搭
而且松大汽船係直駛去宮島碼頭
JR就會兜一兜去嚴島神社個大鳥居附近
比乘客可以係海上欣賞鳥居, 影下相
13：10 落船後我地即刻衝去大鳥居!!!
因為今日嘅潮退時間係13：24
作為日本三景之一
而且每日潮退時間有限
所以大鳥居下面擠滿遊客
企係一直想去嘅宮島大鳥居下面
興奮心情難以形容
雙手不停地影相
瘋狂影相三十分鐘後
係時侯要去商店街食Lunch
沿路見到好多鹿係度曬日光浴
広島同奈良一樣咁多鹿呢!
広島最多人認識嘅美食就係広島蠔
出發前家姐介紹左間餐廳比我
但我地由街頭行到街尾都搵唔到
所以諗住沿住岸邊行返街頭行多次
途經一間酒店門外, 見到有間好細嘅烤蠔店
我記得好多Blog都大力推介
當然要試試!!
一份400円兩隻
我地一人一份
大約三至五分鐘就燒好啦!
又肥又多汁
食完第一隻已經想即刻買多一份!
不過都係留肚食午餐啦......
食完我地重新由街頭開始行
出盡眼力去找搵間餐廳
終於都搵找到啦!（後來先發覺原來都係去錯左...原來我上網睇錯“下一遍標題”個餐廳名....其實睇返啲相同舖入面都完完全全唔同！但我嗰時一啲都唔覺得有問題....）
去錯呢間叫"焼がきのはやし"
都係主要食蠔
門外面有兩個人喺度燒蠔，另外有一個養蠔嘅水槽
我地點左一份生蠔, 一份燒蠔
仲有一份蠔套餐
生蠔新鮮好味, 仲有個迷你海上鳥居伴碟
燒蠔都不錯, 不過唔夠頭先街邊店好食
套餐嗰幾隻吉列蠔油而不膩
飯同湯就普普通通
食飽就去嚴島神社參觀
嚴島神社已經有1400年歴史
1996年更加被列入世界文化遺產
從嚴島神社出黎後就向千叠閣同五重塔進發
沿途風景, 建築物, 櫻花都好靚!
千叠閣
五重塔
趁住店舖仲未收舖
我地再次返到商店街
食下地道小食~買下手信
大約17:00pm再次黎到大鳥居附近
來自世界各地嘅遊客一早已經黎到
霸個靚位，SET好相機腳架
靜靜地等待日落一刻！
夕陽慢慢落下
越黎越靠近大島居
唙金黃色嘅海上倒影襯托下
大家都不停影相, 大家都讚嘆不絕
夕陽完全落山後遊客都慢慢散場
我地都沿著海傍行返碼頭, 搭船返宮島口, 再轉JR去広島駅
返酒店拎行李後就趕去搭新幹線轉移到博多
短短兩日嘅広島之旅完結啦!!!
跟住落黎就係一連八日嘅九州！
到達博多後先返酒店CHECK IN, 放低行李
小休左半個鐘後
就去博多駅搭博多市營地鉄到中洲川端食晚餐！
一出車站就見到一整棟一蘭拉麵！
呢度係一蘭拉麵嘅本店，不過過幾日先再黎啦
因為今日目標係暖暮拉麵！
明明只係出車站後轉右就到....
但係唔知點解係都搵唔到（其實即係行錯路）
搵左十五分鐘終於搵到啦（原本只要一分鐘就可以....）
暖暮拉麵都係要喺門口售票機先買飛
然後先入去搵位坐
等拉麵時見到呢張紙
寫住前幾年暖暮喺拉麵王大賽更勝一蘭，排名第一位！
好快拉麵就送到我地面前
我地食嘅係豬骨湯麵
濃濃嘅豬骨湯底加上彈牙嘅拉麵！
好食到連湯都飲哂！
(食飽先記得我地係想去食葱芝麻拉麵........)
食飽後搭地鉄返博多駅，買埋甜品就返酒店休息