維妮自從08年去過日本東北之後, 到依家一直都念念不忘, 亦從此愛上 日本郊區嘅雪景! 所以維妮再去日本的話, 都係首選日本嘅郊區&雪景!
最近維妮就正籌劃緊出年年頭嘅日本中部.北陸自駕之旅, 原本都好想繼續去日本東北, 始終日本東北我哋都仲有好多地方未去過, 但最後都係選擇咗日本中部.北陸, 選擇呢到, 好大嘅原因係因為{白川鄉}, 維妮好記得唔知幾多年前睇過{最美麗的第7天}之後, 已經極度想去{白川鄉}呢個地方, 事隔今日終於有機會去啦!
維妮依家只係好初步噤籌劃緊, 實際日期都未定實, 只係暫定係出年2月, 但地方呢? 現暫時考慮會由大阪出發, 之後會走訪三個縣, 包括福井縣, 岐阜縣, 長野縣, 但當中嘅長野縣就唔知去唔去到, 可能會太遠了, 但維妮又好想去, 因為呢到有個野猿溫泉, 即係啲野生馬騮浸嘅溫泉! 其實除咗呢三個縣, 仲有石川縣同富山縣維妮都好想去, 但時間上真係好似無咩可能? 真係要好好噤選擇下先得啦!
