期待已久，終於得償所望。
有一點必需要講，講之前又必需要將另一樣野放係前面講先。
呢份劇本真係超級強大。甚至可以用偉大形容。兩個鐘多啲幾乎完全無多餘既野，所有野都按步就班去陳述﹑理清﹑建立﹑破解﹑轉折，包念左懸疑﹑查案﹑溫情﹑社會命題﹑旁支人物互動，仍然可以咁好睇又咁乾脆，真係好撚痴線。
作為電影而非電視劇既好處係可以容許非警探人員去查案既核突感，實際上成件事都係用商業角度出發，呢一點已經好抵屌。
而電影長度所限，要將成條運輸鏈都講解清楚，又唔會混亂或者失焦，每個人代表既每個持份者既每場戲份都平均又緊扣，又係勁神既一件事。
先撇除零售公司既主線，物流公司都算明顯同易寫，出貨主管又係一層一層壓落去，底層司機就一貫貫穿社會現況，呢啲都看似簡單難以操作既編寫，都算；就連司機出身於被迫倒閉既正值電器生產商﹑單親家庭一直煞有介事地穿插到最後成為關鍵一環，兩者又同時作為伏線撐起結局，除左神奇都無野好講。
仲有警察一邊﹑五年前事件起因﹑美日爭鬥﹑野木宇宙。。。全部都包囊其中。。。Oh My God。
大讚完要講就係，光妹真係好靚。
痴線，超級靚。
一場被質問然後爆發，一場開左炸彈既驚慌，點解啲戲可以咁好。
係前段一直都唔明呢個角色既特質。睇落有美國人既嬉皮，遇到事又會唔夠硬淨，口講一堆良言善語，又好老練幫公司謀利益同草菅人命。慢慢先明白エレナ呢個女人的確係咁。工作可以好成熟，背後又真係圖謀不軌；但一切都出於自身既懊悔﹑枷鎖﹑求變，真係詮釋得好好。對手完全係比左下去。
相較之下其他配角印象來得仲深。連中村倫也咁少戲份都好吸引。阿部貞夫又係光芒萬丈。無奈地咁既情況下真係極度失望。所謂野木宇宙根本係老騙。MIU同UDI既戲份少成咁樣，連鏡頭都寥寥可數，不如唔好吹到咁大，當少少彩蛋開心下咪算囉。
呢套戲，唔計小瑕疵，真係想知如果要彈既有咩可以唔鐘意。