有趣既電影，有趣既編導。
甚少對白，木獨既表情配上誇大既肢體表演，適時既編舞，歡樂既配樂，獨特既鏡頭畫面。
好睇。
先係睇左新作《日落喜劇》，覺得電波好對，再搵之前既戲睇。
情節編排上《日落喜劇》係差咁啲，無太大既變化同演變，周而復始咁重覆三次殺手來臨，唔太睇得明硬加上去既巴士罷工有咩意思。
但係成套語言仍然充滿玩味，對白少既好處可能就係減少敍事弱點，係聚焦人物畫面既時候反而可以欣賞多啲表現手法。
好鐘意前半舞台式用人黎跳舞一段，配上音樂走位既節奏，一兩句點題既對白，或者無對白既錯置對話，係印度歌舞片既另一邊，同樣好睇。
當然臨近最後一段輪流帶舞既表演都好睇，只係對劇情毫無幫助，變左歌舞片殊途同歸既夾硬好睇。
《日落喜劇》既好，尚未去到要記低既程度，相隔七年前既作品《巴黎意亂情迷》就真係張弛有度，妙筆生花。
同樣既元素，同樣既表達，連睇兩套都唔覺得膩，反而劇情上更加完整，更加流暢。
同樣置於前半既二人跳舞又係精彩，個種半推半就又驚訝地發現大家合拍既編排好出色。
傻傻更更既婆婆一路避開療養院既人好活潑，同個侄女種神神經經如出一轍，帶點鄉村味道既樂曲睇得好愉快。
唯一唔滿意既係一場偽性愛場口，兩邊分鏡顯示互相牽掛，但係動作上又感受唔到情意，又體現唔出情慾，空有生硬既行為而無內涵。
一而再再而三咁影住腳趾，又RECALL其實《日落喜劇》條女又係有好張狂既腳趾，極度懷疑其實導演係個腳膠。
緊接呢場左右分鏡，下一場係敍述男人一邊對女人既留戀。
最妙睇得最歡樂既，係唔知打飛機定真扑野，拍到成個露宿帳篷飛起左，而同男人一齊訓既，正正係個婆婆。
完事(?)之後婆婆似係出去食事後煙，一輪操作之後同個侄女講「自己係紐約，呢度有香檳，有靚仔」，錯得黎好絕妙。
題外話，科普之後，理科生表示原來法國有咁多座自由神像。。。
到最後婆婆如願登上巴黎鐵塔，個畫面好浪漫。比著一啲大片可能會好壯觀好宏偉咁用特技畫到周圍好靚﹑好磅礡﹑係高處好偉大咁，但係呢度只係三條友坐係碌鐵上面，一人講句廢話，背景係天將明亮既黯淡加火燒雲，少少埋尾寂寥既配樂，然後，婆婆就過世。
轉返去遠景睇城巿，再轉返去加拿大既雪城，一切都好夢幻﹑好童話。
作為喜劇當然唔會停係呢到。去到加拿大重覆一次開門大雪笑位，算係戲裡戲外既一種交待，結尾拎骨灰致辭又係一種重覆既挪用，靜默時背景藍住天落大雨都係估到既笑位，偏偏最失守大笑係個個可降解既骨灰盅，溶左已經頂癮，變到紙片咁比男人BIAO出去真係好痴線，完全對得住荒誕既電影同一眾角色。
另外仲BOOKMARK左兩套年代更久遠既出品，為免審美疲倦，隔段時間煲埋佢。