唔計劇集，近年既韓國鬼怪片都睇左幾套。
《千博士驅魔研究所》﹑《破墓》，呢套第三套。
記憶中係咁。
都唔係恐佈片個種，三套應該算少，都各有風格﹑各有特色。
呢套係喜劇既鬼片，由角色選擇開始就係想要個種效果，中間過程都有不同既笑料，主要都係圍繞「醜」呢個元素。
無細睇簡介既時候見到開幕標題《Handsome guys》仲以為自己睇錯片。。。
去到結尾幅預言圖其實仲玩緊，第一眼覺得「咩料呀」，但係睇落又係幾過癮。
唔覺唔覺就睇左成套，心諗唔係咁快完掛，可以發揮多啲喎，點知真係結尾。比係快活不知時日過，更多既係意猶未盡，或者可以寫得更好﹑拍得更好。
頭段有啲似搞笑版死神來了，中間繼續搞住笑整死啲人，趁疲勞之前大BOSS出黎，慢慢走向恐佈鬼怪一邊。
然後一切都來得好倉促。
突然阿伯翻生，又唔係有咩用，純粹功能講解。
BOSS打兩下就死，雖然無預期大打特打，都唔好來去匆匆呀，畢竟你大費周章等左幾十年先復活喎。
揭下本書就當成前文後理，明明前面既舖排都比較細緻，呢度最可惜。
娛樂性係夠既，睇下呢啲片輕鬆下，個人都平衡返啲，好過下下都做文藝研究咁，猛咁消耗腦細胞。