《我不是教你詐》。
由一開始純良老嫗既慌惶，到不明不白變成被指責既受害者後不甘同忿怒，到逐漸參與騙案既驚恐又欲罷不能，到被問話之後對住全身鏡既反思，到被打受辱之後痛定思痛放手一博，返到屋企仍然感到不安，面對昔日同僚掙扎求存既捨棄眼神，到最後，為自己能夠全身而退既冷漠。
演員演技超強。
拍攝手法同樣非常凌厲。
充滿實感既環境聲，黑夜公路既車燈，無視外物既大頭，一再出現既樓梯，搖擺不定既鏡頭。
雖然會真實發生，雖然係難以想像，開段拍出黎受騙既過程真係完全代入到「一個人」點解會被咁荒謬既電話詐騙呃到。點解﹑點樣唔係重點，「一個人」當下process唔到就係會上當，被騙就係被騙。
蠢，就係蠢。
先前睇《地面師》咁岩有句台詞好適合，大意為「詐騙案既受害者係最無解，任何案件既受害人都可以怪罪加害者，但係詐騙案能夠怪責既就只有受害人自己。」
掉返轉，能夠成為加害者，又何嘗唔需要勇氣﹑智慧？當主角拋開一切拎走啲錢，企係佢既立場，又何罪之有。
結局的確黑暗，只係一切時勢所為，可以為主角既冷酷而著墨，但係世情如是，就算怪導演﹑怪演員﹑怪政府﹑怪呢個世界，都改變唔到啲乜。咁先係現實既黑暗。
至於保加利亞既意義，基本上無野好講。要代入既任何地方都可以同樣移情，獨特既地理﹑歷史，都只係現實既普通法中一小撮變項，放諸香港，何嘗不是比上不足比下有餘，有人想走又有人想入？
同樣粗略估算換做香港既物價，時薪家教30蚊，芝士加腸8蚊，退休金每月560，一塊墓地要16,000。相去遠咩？香港有比較幸福？
反而要解讀既，我都好想問一句，「你知道呢個世界點運作啦？」﹑「呢個就係巿場經濟」﹑「佢信列寧多於耶穌」。之如此類既肺腑之言，其實係咪表達緊對社會主義／共產主義既不捨？
要作結，巿場經濟／資本主義都係萬惡之源，有人會誠心反抗？