Greek, means 「Hen」，中譯《走佬雞》。
初睇以為德國片，德文字，戲中氛圍硬係諗起希臘，竟然真係希臘合拍片。
十分有趣既片，起始一隻雞，終於一隻雞，雞既對白或者多過人，可能人講野再少啲會更好。
雖然有趣，近ending都有啲悲愴，好好奇到底咁樣即係點完，跟住隻雞繼續係間屋搜索，音樂變得陽光，直至好多雞仔由蛋破殼而出，確認成套戲真係一隻雞既故事，即刻通晒。
不得不讚諗出咁既橋段出黎既人好撚勁。
人，係套戲入面只係隔離棚發生既事，好似好多事發生，對雞黎講都唔重要。不過，餐廳主人對佢既「好」偶然令佢疑似傷心地召喚主人，或者睇見隻雞食雞肉，又或者一堆雞仔企係懷疑係腦漿既附近，多多少少覺得套戲無咁慘會更好。
反而成車人因為隻雞蛋而死晒一段純粹覺得幽默，而無乜傷感。畢竟雞可能同人一樣，對無關係既野自然唔會刻意矯情。
不過個一段，實際上都有好幾段，好難拍得好，或者清晰。一直係雞既角度出發，唔知發生咩事，持續既懸疑音樂，總之生左隻蛋。事情係開門一刻先揭曉。靚。
同樣有趣不過略嫌太重人味係拉人既時候其實無乜特別，都比太多篇幅係人身上，多返啲隻雞溝仔既場面會更盞鬼。
仲有，可憐既狐獴類小東西竟然因為隻雞係主角而死，睇黎主角威能去到邊都有。
逃出雞籠一段勁有《Planet of the Apes》既既視感，不嬲覺得《Planet of the Apes》越拍越差係太著重人既特質，呢個近乎係所有聲稱科幻片既通病，幾乎無一種真正擺脫「人」既生物出現。什麼爭權﹑自私﹑貪焚﹑背叛﹑道德，係雞身上真係無，亦係呢套片難能可貴之處。
好好奇到底成套片係點拍。某啲場口或者放任隻雞﹑或者重覆運鏡﹑或者用少少誘餌應該都拍得到，但係要manage個半鐘既電影，由構思﹑分場，都要諗點安排隻雞，再到真係比足晒戲，可以話智勇雙全。