好鐘意呢套劇，難怪咁高評價。
感覺係從未見過既溫暖劇集。好多時日劇都會用到煽情狗血既配樂﹑剪接去催谷情緒，又或者放大一啲道德情感去敲打人心，但係呢套劇由頭到尾，每個個案都係溫暖好自然咁發生同收束，連燈光都好似日麗咁和煦。
特別鐘意去到某啲時刻就會sharp cut無晒聲畫，好似失憶斷片咁。但係記憶係連貫﹑戲劇係motion picture，靜靜的靜靜的一直加疊上去，就組成一段獨一無二既故事。
哪怕去到最後一集回憶殺，都係好平靜咁重現返過去既喜與悲。bygone is bygone，好多野望返轉頭，其實都不必呼天搶地。
「連續三日請佢食同樣既菜，佢二話不說放晒入口」
情真意切。
撇除過份既product shot，結尾有好幾個畫面都超有感覺。
三瓶食住飯既喊戲同ミヤビ畫住畫既喊戲自然係超班，ミヤビ醒唔返既時候三瓶帶住按捺既冷靜亦展現到豐富情緒。
曳搖既運鏡﹑殘舊覆改既日記亦令所有野變得極為真實。
手術中尤如片頭用紅線連住容貌咁串連金句亦係強而有力既象徵。
「婚約者」一詞由當初ミヤビ留低陪伴三瓶既心，到今日三瓶不顧一切要醫好ミヤビ既努力，都比字面上既含義來得動人。
完成手術後三瓶一一細看眾人，如同當日ミヤビ想好好記住大家既感覺。其實全劇落黎所有人物都好有character，互相既作用同改變都充滿人性，而不是工具大於一切既配角角色。從去居酒屋既人數越黎越大，最後既三瓶亦有不同既歡容，可見成個團體既bonding係無可複製。
另外值得一記既係劇裡面有不少真實程度較高既手術鏡頭，唔會過火，但好有實感。