劇本唔錯既一集。
主線放係夏同彌生到，嚴格黎講，係彌生一個。
兩個人都終於認清自己自私既一面，與其話發現或者打開，更多既似乎係醒覺。
前半段仍然勉強自己扮演好人，實在難看。
奇怪既係夏去到呢個moment依然無同彌生「討論」點三個人一齊行落去，一味靠講；睇埋下集預告更加現實既認養問題，就知呢條友幾咁可惡。
一廂情願，表面去做好人，實際既行動傷害更深。
彌生既問題基本上好現實﹑好無謂﹑偏偏好難搞。想同一個死左既人鬥，點鬥？
只要睇開啲就會知道，其實水季從來不存在係呢段三角關係入面，並唔係指水季作為媽媽唔存在，而係之於夏，水季根本唔存在。
七﹑八年既時間過去，夏同水季早就唔係個回事，即使夏點扮演，海點引述，水季都係外野既第三者，對於從頭到尾都唔認識水季既彌生黎講根本並無二致。
當然，心理關口過唔到就係過唔到，有情緒唔係壞事，壞既，係要披住良善去扮好人者。
係度諗，過多兩三年，當夏唔再係彌生認識既夏，佢一樣可以做個新女友﹑新媽媽。反正呢個人都係會面對「帶住海既老手爸爸」，呢一個人亦係彌生唔認識既人，重頭開始就係咁簡單一回事。
時間可以改變一切。
唔知係角色問題定演員問題，係彌生難過表白一段，夏既反應係形如陌路，無捉實彌生既手，無替佢抹眼淚，只係放幾張紙巾係佢手心，甚至調整坐姿都係一種好有距離性既舉動，本身仲以為呢個人吞吞吐吐麻麻煩煩係咁既性格，點知最後竟然會攬住海黎表達傷心，真係刷新三觀。
演員問題就不嬲都覺，目黑蓮真係。。。唔識點欣賞佢既戲。從醖釀分手到月台離開，都無辦法勾起感情，淨係覺得佢做緊戲，唔好睇。
最尾話要接海一齊住，會擺佢第一位，更加似一個偏執變態狂魔，無左條女死捉住唯一有既親人，勁恐佈。
當然角色都應該有呢種心態，就係一個壞人。
有村有幾場其實都唔錯，起碼坐車離開先喊出黎係有感動，不過大致上都係差咁啲野咁。
突然被夏叫停同想抽開隻手兩場都硬係格格不入，連唔到戲。
又係最簡單既比較。古川琴音同池松壯亮一小節都replay幾次，分手場口replay只係為左學日文。
除左劇本扣得緊左﹑無咁離地﹑無亂插分支之外，無聲既畫面都好有張力。
有村交待遺物﹑扮手布公仔講「唔使客氣」之後尷尬氣氛濃烈既一場寧靜好好睇。
mute左目黑蓮係月台爆喊既處理都更加有力。
反而係有村頂唔順係車廂喊個度鐵路聲可以強返少少，應該更有離別既味道。
「係變得討厭自己﹑或者開始厭惡喜歡既人之前直視內心既黑暗，做出分開既選擇。」
呢個命題好合我意。
而某程度上我係認為「分開」並不是唯一既選擇；同時真正既喜歡係會經得起呢個考驗。