Day 151

9月12日 (Day 151)
起點：道の駅白い森おぐに
終點：道の駅豊栄
行走時間：約3hrs (實際踩車時間)
行走距離：64.02km (實際踩車距離)
路線概述 : http://yahoo.jp/-E-Tec
景點Explored : 關川巿，SuperCenter (無敵超市)，豊栄

記事、趣聞：
抖夠今早出發，告別山形県，進入新潟県，亦都暫且離開東北了，東北六県去了三個，稍後會去埋宮城県仙台，總計去了四個，還有岩手同福島無去，其實有點可惜。不過唔緊要，完成到今趟旅程已經很滿足，又係果句，將來實有機會去的!!
完成東北即是要進入單車最後一部分，富山石川中部，當中最期待最壓續既係世界遺產白川鄉，拭目以待!!!
好，現在就預告下去新潟既活動，實質暫時無乜景點想看，只係順路經過，初步看了介紹多數以食為主，看來新潟這個水之都係主催食文化，都Arm我架。看見三番四次都有介紹新潟三条巿咖喱拉麵，70年，歷史悠久，中晒我口味，主打目的一定是它了，還有立食文化，跟住就無其他目的了。
今天還未到新潟巿的，明天才入。一路都係踩踩踩，可能肌肉放鬆左兩日，開頭未夠熱身，腳軟軟咁，但後來順番，有番力量，踩得勁爽，加上回到一片大地，爽快放，Enjoy my life!!!!
臨完成之前去左一間super center，超平，乜野都要平人一點，大，齊，多，平，簡直係無敵的超市，令我控制唔到自己，買野食，對自己非常好，但都慳住黎買，炸野食係主打，因為夠晒高卡路里，哈哈，仲有記得買番Gas了!!!
到了道之站，有好多觀光資訊，原來我有眼不識泰山，之前不太清楚這個地方，原來新潟都幾正，食真係一個主打，其二係有個佐渡島十分之吸引我，好想好想去，好想一周左佢，但如果去我就唔夠時間；好多好多特色野食、景點還有福島潟、信濃川夠長又有好多支流遍滿全新潟県，水之都這個名好配合它，唯有同自己講，再黎既地方又多一個了，下次下次!!! 咁搞法去極都去唔晒，哈哈!!!
呢個道之站我比既評分算高，又有free wifi，公園又清靜，安安靜靜過了下午同夜晚，準備聽日的行程，原來得番好少日子咋....感覺唔係想快D完，反而係有點不捨呢...好好enjoy 埋黎緊半個月!!!

後記: 休息期間見到兩個外國人，一男一女，backpacker黎的，揹著大大背囊，在道之站停車場不斷敲人車門，我諗係想答順風車，佢地都幾有恆心，一見到架車有司機就走去問人，大大話話睇住佢地問左半個鐘，問晒全部車咁滯，雖然都係得個吉，最後唔知佢地行左去邊，但係都要比個讚佢地，我還以為有日本人會車佢地呢。
佢地呢種體驗都幾特別，係極之有流浪Feel。不過我反而麻麻，有架單車你話幾好呢，自己想去邊就去邊，唔洗求人，係辛苦D，但起碼可以隨心所欲，靠自己去完成丫嘛!!

早餐： (¥0 公仔麵+ 98咖啡)
午餐： (¥咖喱腸炸包+芝士火腿炸包+檸檬茶，好嘆)
下午茶：(咖喱芝士火腿炸餅+豬肉炸餅+咖啡，好嘆)
晚餐： (¥咖喱+炸雞扒+飯，好飽)
額外支出： (¥1760 超市雜食+ 434 麵包兩大舊+ 98烏冬)

相片