31個月
曾經好有衝動想將依個blog 摺埋, 因為都唔知仲有冇人睇, 如果係俾自己睇, 我打係電腦都得啦, 又何需要一個blog 呢... 點知, 原來仲有人睇o家, 同milk EE say 個hello 先, hello milk EE!5月份落o左好多雨呀, 想去街都去唔到。一o黎weekend 要返學, 二o黎落雨邊度都唔想去。德貞的學前班, 6堂我o地只係上o左4堂, 說來慚愧, 一堂skip o左係因為懶惰, 一堂係因為病o左所以冇返… 但我o地都有張cert 喎。可能9月份唔係度讀, 所以我同老師及其他媽媽都冇咩特別多的交流, 唔似其他媽媽, 好積極。 但完o左依個學前班, 星期六, 我同悠悠又可以過2人世界了, 如果daddy 拎到假, 就可以一家4口family day 了。悠悠逢星期日在BAMBINI 上的英文Playgroup, 因為teacher Jenny 唔做, 要轉老師, 我o地又差唔多上晒o的堂, 既然轉老師, 就不如轉去星期六的teacher Emma 班啦, 咁我o地星期日就唔使咁頻撲, daddy 星期日的例假, 可以上完主日學同我o地去街了。但係teacher Emma 班要排隊, 我o地(悠悠同埋playgroup 好朋友Sophie)係waiting list, 所以依個時候, 我o地一家的weekend 係處於真空期, 我o地無所事事o家, 歡迎大家約我o地去街呀!好耐冇帶悠悠去廸士尼, 一來天氣唔好, 二來我o的假唔多, 所以冇咩必要都唔會拎假。但weekend daddy 拎唔到假, 就等我weekdays拎一日啦! 悠悠想去廸士尼好耐了, 琴日 5.20 終於都出發, 由爸爸搓車車我o地去, 全程不過30分鐘, 真係好快。 因為會員關係, 停車場日泊$160平$40, 橋費來回$30, 以前冇車, 我o地都係搭的士來回青衣, 所以其實如果就咁講交通費, 自己搓車入去其實都算抵。 朝早好好天呀, 有太陽伯伯, 天氣好熱, 但唔算多人, 多數都係遊客。但下晝就落大雨了, 仲要係黃雨tim, 好在室外冇得遮的遊戲都係有太陽時玩o左, 落大雨o個陣悠悠就瞓o左覺, 一瞓就個幾鐘了。 因為琴日唔算多人, 我o地玩o左好多遊戲, 其中幾樣係新玩的, 之前未玩過。馳車天地我一直都好想帶悠悠玩依個, 因為係安全情況下俾佢揸車, 平時見daddy 揸, 佢會話大個都揸車車, 車我o地去街, 仲安排晒坐位, 佢坐司機位, daddy 坐隔離, 我坐後面, 細佬坐佢依家坐緊o個個car seat 位, 爺爺嫲嫲(或公公婆婆) 坐最後(我o地係有7坐位的5人車)。平時依個遊戲要玩要等成60分鐘, 琴日 30分鐘就得了。但係大肚係唔玩得o既, 所以daddy 同悠悠揸, 我就負責影相。悠悠有得揸車好開心, 玩完仲唔想落車tim。轉轉彈弓狗 + pooh pooh 蜜糖車搓完車, 去拎pooh pooh fast pass (1:45-2:45), 天氣真係好熱, 頂唔順就去o左反斗奇兵買frozen yogurt 食, 食完再食飯。之後見有時間, 排彈弓狗都係 20分鐘, 成日見人玩又未玩過, 我又話要去排隊了。雖然係兜大圈的兒童版過山車, 但依個車速對悠悠來講可能都有o的快, 有o的位佢大叫, 好似大人玩過山車咁, 好搞笑。不過佢冇喊, 玩完仲識笑, 咁即係ok啦！玩完2:30, 仲有 15min 行去玩pooh pooh。依個悠悠玩o左好多次, 係屋企又同佢講pooh pooh 森林故事, 點知一坐就全程dup 低頭, 坐完問佢做咩, 佢話驚wor…幸會史廸仔依個又係新o野未玩過。上次想入去, 但悠悠話驚入面黑, 所以冇入到, 但係出面又見到史廸仔同人影相, 又覺得佢得意, 氹氹下就話下次入。下次即係今次啦, 佢又真係冇o野wor, 可能因而daddy 買o左爆谷, 所以一路食一路等, 15分鐘好快過, 不過就開始落雨了… 其實我o地平時都冇乜接觸史廸仔, 所以悠悠對佢應該冇咩印象。我又以為依個係劇場, 會有個真的史廸仔走出來同小朋友玩or 做musical咁, 不過依個史廸仔原來只係向大電視度(好似卡通片咁), 不過就有真人配音, 變o左係一個互動形式, 咁依個史廼仔講o野都好好笑, 好識搞氣氛, 不過講o的o野小朋友可能唔明, 大人就覺得好笑o的咁。嗯, 都ok o既, 不過悠悠應該想快o的出去食番爆谷多o的。Space Mountain我o地係史廸仔出來就被困o左係space mountain 度了, 落大雨, 行雷閃電, 悠悠無電, 所以daddy 好落力氹o左悠悠瞓了。之後見無所事事, 我就氹daddy 一個去玩space mountain, 我就梗係唔玩得啦。初頭佢都唔肯o家, 但我就話第時亞女大個想玩搵人陪都係搵你o家ja, 你依家唔入去睇下你第時就唔知啦。就係咁, daddy 就入o左去了… 出到來, 佢話頭都暈, 因為入面好黑又高速, 所以真係睇到頭暈眼花。Daddy 玩完, 雨細o左, 就連人帶車去o左餐廳坐, 休息等悠悠醒了。小小世界 + 米奇金曲頒獎典禮5點幾起身, 爭取時間玩多幾樣, 就去o左小小世界。玩完又去探下BEBE, 邊個係BEBE? 就係米奇金曲頒獎典禮個節目主持人law！依兩個又係玩o左好多次了, 所以都唔多講, 不過有音樂有跳舞, 依個女係唔會悶, 都會拍住手, 跟住un, 好開心。咖啡杯最後一個遊戲就係咖啡杯啦, 一睇完頒獎典禮見到無人排, 即刻行過去啦, 玩埋依個就真係好完滿了。原本想睇埋煙花先走, 不過玩o左成日大家都好攰, 返屋企沖涼食飯好過啦。雖然冇可能玩晒咁多o野, 又落雨, 但係琴日真係好開心, 因為感受到悠悠開心, 我同daddy 都覺得, 只要悠悠開心, 我o地就開心了。好想好想快o的又再同悠悠去玩！窩心事分享：前一日, 我臨時拎假諗住同悠悠去廸士尼。適逢悠悠全日都冇懶wiwi, 識得同嫲嫲講去wiwi, 我o地就同悠悠講話佢好叻, 所以聽日就同佢去廸士尼, 佢好開心。因為佢想去好耐, 我o地平時就同佢講要等爸爸媽媽一齊放假先可以去。到5.20, 我一早起o左身, back up 個電話, 就走o左落樓下, 悠悠瞓醒唔見o左我就喊, 問daddy, 媽媽呢? 佢好掛住我… 我係樓下聽到佢叫, 但我冇出聲, 搞埋少少o野先上去, 佢一見到我就係驚訝開心的表情, 原來媽咪係度o既! Daddy 見到依幕都感動到鼻酸酸, 兩個傻人！又係廸士尼好多哥哥姐姐俾貼紙悠悠, 我同悠悠講話你咁多貼紙, 可唔可以俾o的細佬, 佢就貼o左兩張係我個肚度。悠悠家姐真係好錫弟弟o家!!! 媽咪知道, 悠悠成日攬住我, 其實係都係想攬弟弟。每次見到悠悠做一o的錫弟弟的行為, 我都會鼻酸酸, 好感動, 充滿著老懷安慰o既感覺o家。廸士尼annual pass, 7月頭就到期了, 唔續住, 等悠悠10月要俾錢o個陣先一次過買番annual pass 啦, 不過第時返學, 可以去的日子真係唔多~~~ daddy, 你襯依家唔使返學, weekdays就多o的帶佢去啦！小插曲：琴晚去完廸士尼, 大家都好攰, 不過我屋企人夜晚9點半搵o左公公婆婆好多次, 打番去都冇人聽, 我10點幾都係咁打返去, 手提屋企都冇人接, 好擔心, 明明之前7, 8點仲搵到的, 9點半就搵唔到。於是daddy 就提議話佢返去lam tin 睇睇, 好彩公公婆婆只係太攰瞓o左…嚇死人了。感激daddy, 幫我返去睇兩老, 出o左去成日, 抱o左悠悠成日, 又揸車, 又腰痛, 一定好攰, 仲要夜媽媽10:45幫我出去睇佢兩個, 真的真的非常多謝你。
