忙碌聖誕週（下）

25th 諗住聖誕正日少人去公園啦掛⋯於是同冰又去寫生，今次揀馬鞍山公園

我係爆多野攞，太搞笑～一定要影返張～又有我幾鍾意嘅《妖怪手錶》擺設～

點知都係好多人⋯又做左景點⋯仲好多人冇禮貌影我地相⋯又俾啲小朋友不禮貌對待⋯又多人影結婚相⋯又有蜜蜂⋯有啲嬲同冇辦法專注⋯我直頭畫唔到⋯冇完成作品之餘，嗰半幅都極差⋯ 

夜晚去朗豪坊試新雪糕氹自己，啲雪糕色好似盒乾粉彩，特別係藍色，睇下佢咩味啦，名叫「藍色雲尼拿」，同冰講：「藍色即係咩味」，冰：「化學色素味」 呢間公司個marketing真係"Goodest" Naming⋯結果我揀金莎味同藍色邊隻甜筒，而甜筒係好好食，難得我讚佢！因為我係唔鍾意食威化，一般甜筒我都唔鍾意食，而呢個甜筒係朱古力曲奇造嘅，藍色邊係砂糖，但藍色邊個位同雪糕味唔夾⋯ 相當貴嘅「試食」⋯

26th 本來約左祖兒，但佢有事改期，變左同屋企人過，即係喪食廚神母親煮嘅野

27th 中午意外食到前男友整嘅三文治，唔算好食，不過真係有心機嘅⋯係永遠有野煮燶囉⋯燶左嘅恕我咬唔落⋯夜晚食韓燒+東海堂蛋糕～雖然唔係食得多，但都夠晒滿足

28th 去尖沙咀幫母親大人做樣野，夜晚又小學聚會！今次4個女生小聚～傾得好開心～咁多年冇見，大家仲可以好坦白真誠咁講自己野，係非常珍貴嘅友誼～～臨尾傾到唔捨得走呢～～我同呀萍仲留喺街頭傾多左兩個鐘先返歸！結果吹到感冒了⋯

29th 累積多日勁食熱氣野、街頭吹風⋯喉嚨痛+感冒⋯聖誕週正式完結，養病

忙碌聖誕週（上）

估唔到回復單身嘅第一個聖誕會咁忙 多謝朋友們咁落力鋪滿我日程～

由20號開始忙到今朝！行程多過拜年添

20th - 22nd 主要喺屯門&油尖旺活動

連日以來去左好多地方、見左好多朋友～厲害在講左咁多都未喉嚨痛

23rd 非常榮幸以Guest身份出席TVB Party～大家照舊錫到我燶～係咁燒野我食、俾褸我着，仲特登俾兩個獎我添 

其中一份係Star Wars杯，我用唔着而有同事啱，就交換左～變曬做朱古力～～哈哈～～

中Bingo嘅佳哥好搞笑～努力燒野食，都可以對到飛，攞獎時仲拎住支燒烤夾跳下跳下～

睇返合照都覺得大家好開心～

估唔到可以認識到傳說中嘅CS大佬，傾到咁多計～

其實當晚我好滾動，老細、大佬們、呀姐都十分關心我照顧我，教我好多野～～我一定會努力架！

最搞笑係CS大佬唔認得我，話唔關我個妝事，係我多左自信（這就是回復單身的好處）

玩到24th 朝先瞓，原先應該同朋友去美食展嘅，但佢地由我瞓而取消左，唔緊要，夜晚起身去食大餐！

結果食得太飽⋯成日想等落少少格就再食啲，特別係雪糕⋯起身果下先知飽到勁頂⋯超想嘔但忍住！去到地鐵站口撞到石少都唔敢say hi，驚一開口就嘔 搞到佢又以為我飲大左就唔好啦

打邊爐、韓燒果啲都冇咁誇張，係日式放題先會成日食過龍 （待續）