寫出死人能如常生活既橋段，放棄陳套既重點，唔寫三個小孩點由意外死後堅強成長﹑唔寫唔同家庭點面對生離死別﹑唔寫靈體點輯兇報復﹑唔寫死者點可以回歸生界，刻意想做到啲乜但實際上乜都做唔到既失敗作。
個妄想佬一段係想點？強行扭出黎比三女真正回歸背後故事？然後唔知點解優花老母會報仇﹑唔知點解櫻一啲家庭背景都無﹑唔知點解個兇手有需要出席，然後三個大叫一輪返唔到去繼續生活又再無然後？
難道無妄想佬呢一切會唔成立咩？
既然瘋狂離地到三個女角明明可以自由生活成長都唔去擴展自己既世界，死都要死去做無人工無人注意無人需要既社畜，擺明用暖光橙住成個畫面去講死左都生活得好好，唔係要聚焦生離死別既界限，何必加插一段毫無衝突既情節呢？
作為無人無物九歳就瓜左既美咲，連唔捨得丟低美好既死後生活既權利都無，毫無特色毫無感情亳無姿態地去陪兩個朋友回歸人間，好難理解演員點會接一個咁平面既角色。戲入面所有唔開心唔好既野只要咕一聲吞左，唔好在意，就完。做黎把撚。
以致於十二年黎份音樂劇本都無人郁過，成間音樂室好似封塵左只為比男角發現，而男角係唔知點解要接收個條鎖匙，甚至九歲既小朋友感情點解會因為咁奇特既原因放棄成個人生，男角好似同樣地一個朋友都無無人開解過，偏偏有個疑似拜金女好似乜都知，甚至連同全世界一齊認為呢個無彈琴十二年純粹九歲時候彈琴好好既頹廢佬可以忽然成為超級彈琴家，所有野堆疊出十幾分鐘既陰陽相隔讀對白一段只係尷尬到無眼睇，去到最後仍然唱足十分鐘合唱團鏡頭不停重覆三女特寫，可見菲林好值錢既世代已經唔存在。連觀眾既時間都被想像成為廉價垃圾。
幻想中既結局係三女唱唱下就自然消失。可惜佢地仍然要為片長撐落去。唔敢想像佢地點繼續埋頭做社畜，連死都死唔去既人真係好可憐。
只能夠講，三個女角係全戲唯一可取既地方。