終於有一集對得住個招牌。
真心唔識欣賞佐藤健既所謂演技，知道桐哉被人捅刀入院之後個反應仲細過見到台下面有騷動既時候。其他三個人既擔心又堅持既表現仲有力得多。特別係高岡話「我地係度頂住」個下最吸引眼球。明白呢個角色的確無咁表面，好多野收左係底個浸，但係對比其他事物，又比如朱音開始起鼓個陣個情緒起伏真係差太遠，彷彿桐哉真係臭四咁款。
相反菅田將暉真係好睇。狂妄﹑溫柔﹑驕傲﹑真誠投入，通通都有戲，輪廓分明。另外歌迷瘋癲叫唱一段感動到喊，雖然劇情太超現實，捅完刀做手術醒返臨時安排聯播所有野秒速發生，由會場歌迷叫囂到兩兄弟共唱都係水到渠成，情真意切，好難唔賣帳。
正正係呢種熱血同對音樂既執著先令套劇好睇，搞咁多男男女女愛情曖昧搞到失晒色。寧願將空間篇幅還比眾人，講多啲咁多個團員﹑甚至桐哉PARTNER真廣既相知相遇﹑合作追逐﹑尋找自我既音樂路好過。
驚慌完感動完最後一邊安排交待藤谷有病一邊大玩青春團魂，收到個靚尾。最正係無再係朱音暗戀藤谷上面拖拉，將懸疑由開巡演帶過，不落俗套。