一如既往地，呢個blog又再拖咗好耐先更新到，日子已經嚟到五月，依家先開始寫一二月嘅份，都唔知仲記得幾多了。
原本諗住臨飛日本之前喺機場冇嘢做寫一二月嘅，但最後都係冇寫到。咁點解又會喺機場嘅？喺呢個一二月blog入面就會有解答。
一月 · 二月
一月大致上都冇咩特別，係喺vtuber方面有事情發生，呢個留返喺vtuber嗰度講。
就喺呢個一如既往嘅一月嘅某日，HK Express出咗呢個搶零蚊機票嘅活動，原本朋友問我去唔去我都仲猶豫緊，因為依家未有工返緊，到時如果做緊嘢又唔知攞唔攞到假，但係好自然咁俾人預埋我嗰份，最後又真係搶到，咁就多咗個五月去福岡嘅旅程，不個過時間就返工朋友得嗰幾日，又晏晝機到下晝機走咁。不過呢個都未係我所講臨飛前打算寫blog嗰轉日本，依家嘅時間點五月福岡之旅仲未出發。
二月要講緊好似都係咁，不過之前講咗好耐要去嘅露營終於去得成。日子係大年初二，又係就返工朋友嘅紅日假期先呢啲時間去(雖然最後佢新年假都唔係淨係放紅日)，原本都已經冇咩氣氛嘅農曆新年又少多半日，次次都有種咁就過完年嘅感覺。
不過呢次露營嘅體驗係唔錯嘅，一班人圍住柴火傾偈(雖然啲煙好攻眼)，又有大廚出手，有湯有麵又有肉，我地縮埋一嚿等食就得。不過真係好凍，香港濕凍真係不得了，成晚喺個營度都唔知有冇瞓著過，又凍又多車聲，一朝早就起咗身睇日出，嘆住啡坐喺露營櫈度望住個太陽出嚟係真係幾好feel嘅，又有大廚煮早餐，大家懶懶散散咁過咗，有board game都冇玩。體驗係唔錯，但個價都唔平，租營地租營具買呢樣嗰樣，知道一定唔會常玩又費事買營具，都係一次半次玩下算啦。
露完營之後嘅某日，又有機票小優惠，原本班friend plan咗好耐一齊去東京玩，我嗰時冇預會去，趁住呢個小優惠，個friend用佢嘅口術好成功咁拉埋我一齊去，不過都啱嘅，可以咁自由咁去旅行真係冇返工嘅時候先得，依家唔去等幾時。於是喺三月就多咗個東京嘅旅程啦，呢次就係我所講打算寫blog嗰個飛日本前。
Vtuber
我嘅追vtuber進度依然落後幾個月，冇刻意去追依家只係食飯嘅時候睇下，應該有排都唔會追得貼，連直播都好少睇了。
講到一月就有トワ様嘅周年，雖然周年live嘅內容已經唔太記得了，但係今年都好好彩搶得到直筆，我始終都係トワ様推。
然後一月仲發生咗件大事，就係メル被解約。成件事都嚟得好突然，仲要係解約，冇畢業直播，連成個頻道啲片都冇得留低，對vtuber嚟講真係一個好差嘅結局。官方可以透露嘅就係得咁多，呢隻天然吸血鬼都唔似係會做啲咩，只能夠話真係不幸。
消息距離メル頻道洗晒仲有個幾月，我又重新開始返剪精華，希望可以喺メル啲嘢清晒之前留個記念，同盡可能試下吸引到人訂閱已經90幾萬訂閱嘅メル，希望衝到上百萬訂閱。然而我嘅剪片速度都係一如既往嘅慢，呢個幾月都淨係出到五條片，而且越後就越少人睇，睇嚟都係出唔到啲咩力，我都開始諗剪精華係咪唔啱我。
MyGO!!!!!
二月MyGO!!!!!嘅Zepp Tour正式開始，當然依家嘅我都只係可以睇網上轉播，真係好想可以睇現場，呢次Zepp Tour四場仲要有兩場係冇轉播嘅，如果有晒四場我應該真係會買晒嚟睇。
Zepp Tour嘅第一場係東京場，呢場將潜在表明同君の神様になりたい兩首連住一齊真係太強，近幾場都冇唱君の神様になりたい，一聽到愛音話係cover環節但又啱啱唱完壱雫空個氣氛好似唔太啱，估唔到嚟到首仲耐冇唱嘅二息歩行一轉氣氛，然後再接嗰潜在表明再接君の神様になりたい，兩首都係聽現場更加好聽，呢次嘅潜在表明主唱太拼命了(稱讚)，真係好鐘意呢種心の叫び嘅感覺。
呢場有第一次聽到嘅ましょうましょう現場版，個編曲又同平時有少少唔同更加好聽，仲有楽奈嘅帥氣點弦都係一大看點。然後就係新曲砂寸奏，呢首嘅編曲同中間和音部分都好鐘意，而且呢首同二息歩行嘅燈光都好型好有feel，係差在第一次披露就有重大失誤，但呢首係真係上癮，之後聽返錄音版都係咁loop。
過場互動仲有愛音還原動畫比心，encore之後又有ここりん雙人比心，又食到糖了。
雖然呢場都係有唔少瑕疵，主唱唔夠氣冇唱到歌詞，樂器失誤節奏錯咗，但睇佢哋演奏得真係好開心，真係希望佢哋可以繼續進步越嚟越好。
開呢個post嘅時候係五月，依家已經係六月，咁有既視感嘅點解，依家嘅時間點福岡都已經去完，仲有三四五月等緊我回顧，三月嘅東京之旅都未諗到要點回顧，六月福岡都去完啦，希望唔好再拖咁耐盡快寫到出嚟。
2024已經差唔多半年。
好想逃離。
2024.06.11 LittleCat