觀塘除咗好多 Party Room，仲有好多到會美食。小編係觀塘番工，雖然觀塘好多人有時都幾煩厭，但係Office係觀塘嘅好處就係有超級多美食。無論係工廠大廈、茶記、日本菜、泰菜、台灣菜都會可以係觀塘搵到。係香港食個午餐都好貴，又唔一定好食，所以今次會介紹5間小編J同同事Lunch Time 食過而覺得好食嘅餐廳（同埋最緊要係值）！另外想訂生日蛋糕？黎 ReUbird 啦！
1）高興
相信係觀塘番工嘅人都識得去高興食午餐，餐廳裡嘅設計係參考舊式香港，有懷舊復古嘅味道。佢地嘅 Lunch Set 咩種類都有：日式韓式，焗飯意粉都有，仲包埋飲品，而且價錢好平，$65 一定埋單。又唔會限時，同朋友傾多一陣都唔驚被人趕～ 普普通通食個平Lunch 高興的確唔錯！
地址：觀塘成業街19-23號成業工業大廈地下2號舖
2）阿鴻小吃
阿鴻小吃係一間米之蓮餐廳，專食潮洲小菜。佢地餐牌上所有食物，我都覺得好好食。特別推介係 (1) 蠔仔粥：好足料啖啖都係蠔！(2) 櫻花蝦撈麵或其他撈麵：個汁好正，配埋其他餸好濃味！仲有無論係素食，定滷味燒味都好好食！價錢又唔算好貴，抵食！
地址：觀塘鴻圖道83號東瀛遊廣場地下A舖
3）I’s Land Cafe
L’s Land Cafe 係一間好大嘅餐廳，所以Lunch Time去都唔會覺得好迫，裡面佈置好靚好似係花園享受緊Lunch咁，有綠油油嘅花草樹木作裝飾。佢地 Set Lunch 包頭盤：湯同包；主菜；同飲品。小編覺得個磨菇湯有少少咸，不過佢地嘅主菜（小編試過 (1)雞肉野菌意大利飯 (2)深海鱸魚配紫薯蓉）好好味，份量又足夠，而且仲幾健康，唔會有好多味精。
地址：觀塘開源道62號駱駝漆大廈1座6樓A舖
4）Add Some Thai
Add Some Thai Restaurant 係一間泰國餐廳，面積大有空間感，坐得好舒服，而且佈置充滿泰國風。我一定要推介大家去食佢地嘅小食同甜品！上一次食佢地嘅「自家製手打蝦餅」食到不停，同出面嘅蝦餅完全唔同，脆脆皮，每一啖都好享受。而佢地嘅甜品：芒果糯米飯個飯有啲硬，難咬開，不過芒果好甜！仲有「自家製千層糕」，個椰味啱啱好，寫到而家好想食～
地址：觀塘開源道62號駱駝漆大廈一座9樓D室
5）小時光
小時光設計好得意，裝修好似一間80, 90年代舊式學校，擺設似班房一樣，有懷舊玩具做裝飾。除咗地方裝修有特色，食物都有水準！台灣滷肉便當、香酥雞便當、麻辣雞絲冷麵、台式紅燒牛肉麵等都好好味～ 麵嘅湯底好正，肉質地又好，價錢又抵食（只需要$60 就食到有水準嘅Lunch)
地址：觀塘興業街18號美興工業大廈A座1樓C室